WEIGHT & METABOLIC CARE
Weight & Metabolic Care — ավելորդ քաշ և ճարպակալում ունեցող մարդկանց համար նախատեսված համալիր բժշկական և կրթական ծրագիր է։
12 շաբաթվա ընթացքում հիվանդի հետ աշխատում է մասնագետների թիմը՝ գնահատում է առողջական վիճակը և նյութափոխանակային ռիսկերը, մշակում անհատական բուժման ռազմավարություն, վերլուծում սննդակարգն ու սննդային վարքագիծը, ընտրում ֆիզիկական ակտիվության համապատասխան տարբերակներ և սովորեցնում այն հմտությունները, որոնք անհրաժեշտ են քաշի երկարաժամկետ կառավարման համար։
Ծրագրի նպատակը 12 շաբաթվա ընթացքում որոշակի քանակությամբ կիլոգրամներ կորցնելը չէ։ Սա ինտենսիվ փուլ է, որի ընթացքում ձևավորվում է քաշի և նյութափոխանակության առողջության հետագա կառավարման անհատական ռազմավարությունը։
ԻՆՉՈՒ ԵՆՔ ՍՏԵՂԾԵԼ ԱՅՍ ԾՐԱԳԻՐԸ
Ճարպակալումը քրոնիկ, կրկնվող և բազմագործոն հիվանդություն է։ Քաշի նվազեցումը բուժման միայն մի մասն է։ Ոչ պակաս կարևոր է ձեռք բերված արդյունքի պահպանումը, մկանային զանգվածի պահպանությունը, նյութափոխանակային ռիսկերի վերահսկումը և հետագա ռազմավարության ըմբռնումը։
Բուժման մեկ ունիվերսալ մեթոդ գոյություն չունի։
Միայն սննդակարգը չի լուծում բոլոր խնդիրները։ Դեղորայքը չի փոխարինում սննդակարգին և ֆիզիկական ակտիվությանը։ Իսկ խորհուրդներն ավելի արդյունավետ են, երբ մարդը հասկանում է, թե ինչու են դրանք անհրաժեշտ և ինչպես կիրառել դրանք առօրյա կյանքում։
ՈՒՄ ՀԱՄԱՐ Է ՆԱԽԱՏԵՍՎԱԾ ԾՐԱԳԻՐԸ
Ծրագիրը նախատեսված է այն մարդկանց համար, ովքեր ունեն՝
• ավելորդ քաշ կամ ճարպակալում,
• ճարպակալում՝ նյութափոխանակային խանգարումների համակցությամբ,
• 2-րդ տիպի շաքարային դիաբետ և ավելորդ քաշ կամ ճարպակալում։
Հատկապես այն մարդկանց համար, ովքեր արդեն փորձել են նվազեցնել քաշը, սակայն այն կրկին ավելացել է, փորձել են տարբեր սննդակարգեր և չեն հասկանում, թե որ ռազմավարությանը հետևել, դիտարկում են դեղորայքային բուժման հնարավորությունը կամ արդեն ստանում են այն, ցանկանում են ոչ միայն նիհարել, այլև հասկանալ, թե ինչպես հետագայում կառավարել քաշը և դրա հետ կապված առողջական ռիսկերը։
ԻՆՉ Է ՆԵՐԱՌՈՒՄ ԾՐԱԳԻՐԸ
01 / ԱԽՏՈՐՈՇՈՒՄ
Աշխատանքը սկսվում է ոչ թե սննդակարգից, այլ առողջական վիճակի գնահատումից։
Վերլուծվում են հիվանդության պատմությունը, քաշի դինամիկան, քաշի նվազեցման նախկին փորձերը, ուղեկցող հիվանդությունները և նյութափոխանակային ռիսկերը։
Լաբորատոր և գործիքային հետազոտությունները նշանակվում են անհատական անհրաժեշտությունից ելնելով։
02 / ԲՈՒԺՄԱՆ ԱՆՀԱՏԱԿԱՆ ՌԱԶՄԱՎԱՐՈՒԹՅՈՒՆ
Նախնական գնահատումից հետո սահմանվում են նպատակները և ձևավորվում է անհատական բժշկական ռազմավարություն։
Եթե առկա են ճարպակալման դեղորայքային բուժման կամ ուղեկցող հիվանդությունների շտկման ցուցումներ, բուժման տարբերակները քննարկվում և ընտրվում են անհատական մոտեցմամբ։
03 / ՍՆՆԴԱՌՈՒԹՅՈՒՆ
Սկզբում վերլուծվում է մարդու իրական, սովորական սննդակարգը՝ մթերքները, չափաբաժինները, ըմպելիքները, միջանկյալ սնունդը և օրվա ընթացքում սննդի բաշխումը։
Այնուհետև սննդակարգը շտկվում է՝ հաշվի առնելով բժշկական նպատակները, կենսակերպը և սննդային սովորությունները։
Առանց ունիվերսալ մենյուների և «արգելված մթերքների» ցանկերի։
04 / ՍՆՆԴԱՅԻՆ ՎԱՐՔԱԳԻԾ
Գնահատվում են սննդային սովորությունները, մոտիվացիան, հուզական գործոնները, քաշի նվազեցման նախկին փորձը և կրկնվող «ձախողումների» պատճառները։
Հոգեթերապևտի հետ աշխատանքը օգնում է հասկանալ ոչ միայն, թե ինչ է մարդը ուտում, այլև՝ ինչու են կրկնվում սննդային վարքի որոշակի ձևերը։
05 / ՖԻԶԻԿԱԿԱՆ ԱԿՏԻՎՈՒԹՅՈՒՆ
Հաշվի են առնվում ֆիզիկական հնարավորությունները, սահմանափակումները, ուղեկցող հիվանդությունները և ակտիվության ելակետային մակարդակը։
Ձևավորվում է աերոբիկ և ուժային ծանրաբեռնվածության, ինչպես նաև առօրյա ֆիզիկական ակտիվության անհատական ռազմավարություն։
Դինամիկան գնահատվում է պարբերաբար, իսկ անհրաժեշտության դեպքում ծանրաբեռնվածությունը փոփոխվում է։
06 / ԿՐԹՈՒԹՅՈՒՆ
8 անհատական պարապմունք էնդոկրինոլոգի հետ, որոնք նվիրված են քաշի և նյութափոխանակության առողջության կառավարման հիմնական հարցերին։
ՄԵԿ ՀԻՎԱՆԴ։ ՄԵԿ ԹԻՄ։ ՄԵԿ ՌԱԶՄԱՎԱՐՈՒԹՅՈՒՆ։
Էնդոկրինոլոգ • Թերապևտ • Հոգեթերապևտ • Ֆիզիկական ակտիվության մասնագետ
Հիմնական տարբերությունը ոչ միայն մի քանի մասնագետների ներգրավվածությունն է։
Թիմը պարբերաբար գնահատում է հիվանդի դինամիկան և անհրաժեշտության դեպքում շտկում բուժման մարտավարությունը։
Բժշկական բուժումը, սննդակարգը, սննդային վարքագիծը և ֆիզիկական ակտիվությունը դիտարկվում են որպես մեկ միասնական և համաձայնեցված ռազմավարության մասեր։
ԻՆՉՊԵՍ ԵՆ ԿԱԶՄԱԿԵՐՊՎԱԾ 12 ՇԱԲԱԹՆԵՐԸ
ՓՈՒԼ 1 / ՍԿԻԶԲ ԵՎ ՆԱԽՆԱԿԱՆ ԳՆԱՀԱՏՈՒՄ
Ընդլայնված բժշկական գնահատում, անհրաժեշտ հետազոտություններ, սովորական սննդակարգի վերլուծություն, սննդային վարքագծի և ֆիզիկական ակտիվության նախնական գնահատում։
Ստացված տվյալների հիման վրա ձևավորվում է անհատական ռազմավարություն։
ՓՈՒԼ 2 / ԻՆՏԵՆՍԻՎ ԱՇԽԱՏԱՆՔ
Բժշկական ուղեկցում, աշխատանք սննդակարգի և սննդային վարքագծի հետ, կրթական պարապմունքներ, ֆիզիկական ակտիվության ձևավորում և շտկում, դինամիկայի գնահատում և թիմային քննարկում։
ՓՈՒԼ 3 / ԱՎԵԼԻ ՄԵԾ ԻՆՔՆՈՒՐՈՒՅՆՈՒԹՅՈՒՆ
Ստացած գիտելիքներն ու հմտություններն աստիճանաբար տեղափոխվում են առօրյա կյանք։
Հիվանդը շարունակում է հետևել համաձայնեցված ռազմավարությանը, իսկ թիմը գնահատում է, թե ինչն է լրացուցիչ շտկման կարիք ունի՝ ինտենսիվ փուլի ավարտից առաջ։
ՓՈՒԼ 4 / ՎԵՐՋՆԱԿԱՆ ԳՆԱՀԱՏՈՒՄ ԵՎ ՀԵՏԱԳԱ ՊԼԱՆ
Կատարվում է հիմնական ցուցանիշների, արդյունքների և փոփոխությունների կրկնակի գնահատում։
Թիմի հետ իրականացվում է վերջնական քննարկում և կազմվում է քաշի և նյութափոխանակության առողջության հետագա կառավարման անհատական պլան։
ԿՐԹՈՒԹՅՈՒՆԸ ԲԺՇԿԱԿԱՆ ՌԱԶՄԱՎԱՐՈՒԹՅԱՆ ՄԱՍՆ Է
8 ԱՆՀԱՏԱԿԱՆ ՊԱՐԱՊՄՈՒՆՔ ԷՆԴՈԿՐԻՆՈԼՈԳԻ ՀԵՏ
Պարապմունքներն անցկացվում են էնդոկրինոլոգի հետ՝ օգտագործելով տեսողական ներկայացումներ, սխեմաներ և օրինակներ։
Քննարկվում են ճարպակալումը և նյութափոխանակության առողջությունը, սննդակարգը և տարբեր սննդային ռազմավարությունները, մթերքների ընտրությունը, ֆիզիկական ակտիվությունը, հորմոնալ գործոնները, քունը և սթրեսը, դեղորայքային և վիրաբուժական բուժումը, սննդային վարքագիծը և սովորությունների երկարաժամկետ փոփոխությունը։
[ԱՎԵԼԻ ՄԱՆՐԱՄԱՍՆ՝ ԿՐԹԱԿԱՆ ԾՐԱԳՐԻ ՄԱՍԻՆ]
12-ՇԱԲԱԹՅԱ ՓՈՒԼԻ ԱՎԱՐՏԻՑ ՀԵՏՈ
Կատարվում է արդյունքների վերջնական գնահատում և կազմվում է քաշի և նյութափոխանակության առողջության հետագա կառավարման անհատական պլան։
Ճարպակալումը քրոնիկ հիվանդություն է, ուստի ծրագրի ավարտը չի նշանակում բժշկական հսկողության ավարտ։
Հետագա բժշկական հսկողության ծավալն ու հաճախականությունը որոշվում են անհատական կարգով։