Շատ ծնողներ բախվում են երեխայի հաճախակի հիվանդանալու խնդրին։ «Հաճախ հիվանդանալու շրջանը» սովորաբար սկսվում է այն ժամանակ, երբ երեխան սկսում է հաճախել մանկապարտեզ, և կարող է շարունակվել այնքան ժամանակ, մինչև երեխան հիվանդանա վիրուսային վարակների հիմնական հարուցիչներով և ձևավորի դրանց նկատմամբ իմունիտետ։
Բայց եկե՛ք հասկանանք, թե ինչպես բաց չթողնել իսկապես լուրջ խնդիրը և միևնույն ժամանակ իզուր չանհանգստանալ։
Փոքր տարիքի երեխաների մոտ հիվանդությունների ցանկացած քանակ կարող է լինել նորմալ, եթե չկան առաջնային իմունային անբավարարության նշաններ։
Առաջնային իմունային անբավարարությունները բնածին հիվանդությունների խումբ են, որոնց դեպքում իմունային համակարգը չի կարողանում պատշաճ կերպով պայքարել վարակների դեմ և պաշտպանել օրգանիզմը։
Առաջնային իմունային անբավարարության ընդհանուր նշանները
- Հաճախակի վարակներ՝ տարեկան ավելի քան 8 դրվագ 1 տարեկանից բարձր երեխաների մոտ, հատկապես եթե դրանք ունեն ատիպիկ կամ ծանր ընթացք, պահանջում են հակաբակտերիալ դեղամիջոցների հաճախակի նշանակում կամ հոսպիտալացում։
- Կրկնվող ծանր վարակներ
- Ոչ սովորական վարակներ կամ վարակներ, որոնք սովորաբար առաջանում են իմունային համակարգի թուլացման դեպքում
- Ստանդարտ հակաբակտերիալ բուժման անբավարար արդյունավետություն
Հատուկ դրսևորումներ
- Աճի և զարգացման հապաղում
- Քրոնիկ փորլուծություն
- Բերանի խոռոչի կամ մաշկի կայուն կանդիդոզ 1 տարեկանից հետո
- Մաշկի կամ ներքին օրգանների կրկնվող թարախակույտեր
- Իմունային անբավարարության ընտանեկան պատմություն
Վարակային դրսևորումներ
- Թոքաբորբ՝ տարեկան 2 կամ ավելի դրվագ
- Թարախային սինուսիտ կամ միջին ականջի բորբոքում (օտիտ)՝ տարեկան 4 կամ ավելի դրվագ
- Սեպսիս կամ մենինգիտ
- Օստեոմիելիտ կամ սեպտիկ արթրիտ
Աուտոիմուն և այլ դրսևորումներ
- Աուտոիմուն հիվանդություններ
- Լիմֆոպրոլիֆերատիվ հիվանդություններ
- Անգիոեդեմա (Քվինկեի այտուց)
- Ծանր ալերգիկ ռեակցիաներ
Այս նշաններից մեկի կամ մի քանիսի առկայության դեպքում անհրաժեշտ է անհապաղ դիմել մանկաբույժի՝ հետագա հետազոտության և բուժման պլանը որոշելու համար։
Գրանցվել
