Հղիության դրական թեստը միշտ բազմաթիվ զգացմունքներ է առաջացնում, որոնք հաճախ խառն են և ոչ միշտ լիովին վերահսկելի։ Եթե հղիությունը պլանավորված է եղել, ապա դա, անշուշտ, ուրախություն է, սակայն ուրախությանը զուգահեռ առաջանում են նաև անհանգստություններ ու մտահոգություններ։ Ինչպե՞ս է ամեն ինչ ընթանալու։ Ի՞նչ պետք է անել կամ չանել, որպեսզի ամեն ինչ բարեհաջող ընթանա։ Եվ այստեղ առաջանում է հարց՝ որքան արագ է անհրաժեշտ դիմել բժշկի։
Այս հարցի պատասխանը բաղկացած է երկու մասից՝ ֆունկցիոնալ և հուզական։ Ռացիոնալ, ֆունկցիոնալ տեսանկյունից՝ առողջ կնոջ դեպքում, եթե չկան ցավեր կամ արյունային արտադրության գանգատներ, շտապ բժշկական հետազոտության անհրաժեշտություն չկա։Իրադարձությունների ընթացքի վրա մենք գործնականում չենք կարող ազդել։ Գոյություն ունի բնական ընտրության մեխանիզմ, որի հետ կապված է հղիության վաղ շրջանում վիժումների բավականին բարձր հաճախականությունը։ Բեղմնավորումների ընդհանուր թվի 20–30%-ն (ձվաբջջի բեղմնավորման և դրա հետագա բաժանման ու զարգացման փաստը) ավարտվում է հղիության առաջին եռամսյակում։ Դեպքերի ավելի քան 90%-ում դա տեղի է ունենում այն պատճառով, որ բեղմնավորման կամ վաղ բաժանման փուլում ինչ-որ բան սխալ է ընթացել։ Մենք չենք կարող դրա վրա ազդել ո՛չ տվյալ պահին, ո՛չ էլ ավելի ուշ։
Գոյություն ունի ընդհանուր պատկերացում և, ուզում ենք հավատալ, նաև կոնսենսուս, որ նման հղիությունը պահպանելու իմաստ չկա։ Եթե տեղի է ունեցել նման «սխալ»․ հղիությունն անխուսափելիորեն կավարտվի։ Այն պահպանելու մեր փորձերը կարող են միայն հետաձգել այդ պահը, ինչը չի նպաստի ո՛չ ֆիզիկական, ո՛չ էլ հուզական բարեկեցությանը։
Այսպիսով, ի՞նչ է սա նշանակում։ Արդյո՞ք պետք է առաջին եռամսյակում ոչինչ չանել և բժշկին դիմել միայն երկրորդ եռամսյակում։
Ոչ լրիվ։ Այստեղ կարևոր է երկրորդ բաղադրիչը՝ հուզականը։ Յուրաքանչյուր կնոջ կամ զույգի մոտ հղիության հաստատման հետ մեկտեղ բազմաթիվ հարցեր և անհանգստություններ են առաջանում։ Անհրաժեշտ է այցելել բժշկին՝ այդ հարցերը քննարկելու, ընդհանուր առողջական վիճակը գնահատելու և հասկանալու, թե այն ինչպես կարող է ազդել հղիության ընթացքի վրա։ Կարևոր է նաև պարզել՝ արդյոք տվյալ բժիշկը համապատասխանում է հենց ձեզ հղիությունը վարելու համար, կազմել հսկողության պլան (ցանկացած հստակ պլան զգալիորեն նվազեցնում է անհանգստությունը), ստանալ խորհուրդներ կենսակերպի, սննդակարգի, ֆիզիկական ակտիվության և այլ կարևոր հարցերի վերաբերյալ։ Այս ամենը բժշկին դիմելը նպատակահարմար է դարձնում հղիության դրական թեստից անմիջապես հետո։
Դիմեք մեզ․ մենք խորհուրդ կտանք հենց այն հետազոտությունները, որոնք կարող են ազդել հղիության վարման հետագա մարտավարության վրա։ Այս յուրահատուկ շրջանում մենք կլինենք ձեր հոգեբանական և մասնագիտական բժշկական աջակցությունը և կփորձենք անել ամեն ինչ, որպեսզի այս շրջանը ձեզ համար լինի հնարավորինս հանգիստ, թեթև և ուրախ։
Բժիշկ՝ Նաջի Լեյլա Նազարովնա
Կլինիկա՝ «Չայկա» կլինիկա, Հայաստան
Ծառայություն՝ բժիշկ-մանկաբարձ-գինեկոլոգի խորհրդատվություն
Թեգ՝ գրանցում
