Բժշկի ցանկացած ընդունելության կարևոր մասը զրույցն է, որի ընթացքում բժիշկը պարզում է ընթացիկ հիվանդության մանրամասները և հիվանդի կյանքի առանձնահատկությունները, որոնք ազդում են ախտորոշման և բուժում-ախտորոշման ռազմավարության վրա։ Սա միշտ համատեղ աշխատանք է բժշկի և հիվանդի միջև, և դուք կարող եք այն դարձնել ավելի արդյունավետ, եթե նախօրոք որոշակիորեն պատրաստվեք ընդունելությանը։ Եվ այսպես՝

1. Սահմանեք դիմելու նպատակը և ակնկալվող արդյունքը

Մինչև բժշկի մոտ գնալը մտածեք և ձևակերպեք՝ ինչն է ձեզ անհանգստացնում և ինչ արդյունքի եք ցանկանում հասնել։ Դա կարող է լինել ախտանիշների թեթևացում, ճշգրիտ ախտորոշում, բուժման վերաբերյալ առաջարկությունների ստացում կամ հիվանդությունների կանխարգելման վերաբերյալ խորհրդատվություն։

2. Կազմեք զրույցի պլան

Կարճ նախանշեք զրույցի պլանը բժշկի հետ։ Դրա մեջ ներառեք հետևյալ կետերը՝

·      Ի՞նչն է ձեզ անհանգստացնում։

·      Ե՞րբ են սկսվել ախտանիշները։

·      Ի՞նչից է կախված դրանց ինտենսիվությունը։

·      Ի՞նչ մեթոդներով եք փորձել բուժվել և ի՞նչ արդյունքներով։

3. Համակարգեք բժշկական փաստաթղթերը

Հավաքեք և բժշկի մոտ տարեք բոլոր այն բժշկական փաստաթղթերը, որոնք կարող են առնչվել ընթացիկ հիվանդությանը։ Լավ կլինի դրանք համակարգել ժամանակագրական հերթականությամբ և պատրաստել էլեկտրոնային կամ թղթային տեսքով։ Դա կարող է լինել՝ վերլուծությունների արդյունքներ, հիվանդանոցների արձանագրություններ, նախկինում տրված նշանակումներ և առաջարկություններ։

4. Պատրաստեք տվյալներ պատվաստումների մասին

Եթե ձեր այցի նպատակը պատվաստումն է, վերցրեք ձեզ հետ պատվաստումների վկայագիրը կամ նախկինում կատարված պատվաստումների մասին տեղեկանքները։ Եթե չունեք բնօրինակներ, կարող եք փաստաթղթերի լուսանկարներ ունենալ հեռախոսում։

5. Գրանցեք Ձեր ընդունած բոլոր դեղերը

Գրեք այն բոլոր դեղերի անունները, որոնք դուք ընդունում եք, ինչպես նաև դրանց դեղաչափերը։ Սա կօգնի բժշկին խուսափել անհամատեղելի դեղեր նշանակելուց և հաշվի առնել ձեր ընթացիկ բուժումը նոր պլան մշակելիս։

6. Հիշեք քրոնիկական հիվանդություններն ու ալերգիաները

Փորձեք հիշել և գրանցել՝ արդյոք ունեք քրոնիկական հիվանդություններ և ալերգիկ ռեակցիաներ։ Հստակեցրեք՝ ինչի՞ հանդեպ է ձեր ալերգիան և ինչպես է այն արտահայտվում։ Այս տվյալները չափազանց կարևոր են անվտանգ և արդյունավետ բուժում նշանակելու համար։

Լրացուցիչ խորհուրդներ

Գիտակցված ընտրեք բժշկին

Կիրառեք գիտակցված մոտեցում բժշկի ընտրությանը։ Հնարավոր է՝ անհրաժեշտ լինի այցելել մի քանի մասնագետների՝ գտնելու այն մեկին, ում հետ կունենաք վստահելի շփում և կկարողանաք վստահել ձեր առողջությունը։ Մի հապաղեք ուսումնասիրել բժիշկների վերաբերյալ կարծիքներն ու առաջարկությունները։

Մի վախեցեք հարցեր տալուց

Բժշկին դիմելուց մի վախեցեք հարցեր տալուց և խնդրեք բացատրել անհասկանալի պահերը։ Սա կօգնի ձեզ ավելի լավ հասկանալ ձեր վիճակը և առաջարկվող բուժման մեթոդները։ Որքան շատ տեղեկացված լինեք, այնքան ավելի արդյունավետ կլինի ձեր համագործակցությունը բժշկի հետ։

Բժշկին այցելության նախապատրաստումը թույլ է տալիս հանդիպումը դարձնել առավել արդյունավետ և էֆեկտիվ։ Հետևելով այս պարզ խորհուրդներին՝ դուք կարող եք ստանալ ավելի ճշգրիտ ախտորոշում և ավելի որակյալ բուժում, ինչպես նաև ամրապնդել վստահությունը ձեր և ձեր բժշկի միջև։