Վերջին տարիներին նկատվում է աճող հետաքրքրություն ծնողների և պացիենտների շրջանում իմունոմոդուլյատորների նկատմամբ – պատրաստուկներ, որոնք կոչված են «ամրապնդելու» իմունային համակարգը։ Սակայն կարևոր է հասկանալ, որ իմունոմոդուլյատորների կիրառումը սուր շնչառական վիրուսային վարակների դեպքում (ՍՇՎՎ) կարող է ունենալ իր ռիսկերը, և ՍՇՎՎ-ի դեպքում դրանց օգտագործումը միշտ էլ չարդարացված է։

Ինչու չպետք է բուժել երեխաներին իմունոմոդուլյատորներով ՍՇՎՎ-ի դեպքում:

Անբավարար արդյունավետություն: Գիտական ուսումնասիրությունները ցույց են տվել, որ իմունոմոդուլյատորների մեծ մասը նշանակալի ազդեցություն չի թողնում վիրուսային վարակների ընթացքի վրա։ ՍՇՎՎ-ն սովորաբար ինքնուրույն անցնում է, և երեխայի իմունային համակարգը ի զորու է ինքնուրույն հաղթահարել վիրուսը առանց լրացուցիչ խթանողների։ Կարևոր է միայն ախտանշանային թերապիան մանկաբույժի հսկողությամբ և «կարմիր դրոշակների» նկատումն ու վերահսկումը։

Անկանխատեսելի կողմնակի ազդեցություններ: Իմունոմոդուլյատորները կարող են առաջացնել տարբեր կողմնակի ռեակցիաներ. սկսած ալերգիական դրսևորումներից մինչև իմունային պատասխանի համակարգի լուրջ խանգարումներ։

Ճիշտ ախտորոշման դժվարացում: Նման պատրաստուկների օգտագործումը կարող է խանգարել ընթացիկ վարակների ախտորոշմանը։ Պացիենտի վիճակը կարող է փոխվել հնարավոր կողմնակի ազդեցությունների կամ ալերգիական ռեակցիաների պատճառով, իսկ դա կդժվարացնի բժշկին իրականացնել ճիշտ դիֆերենցիալ ախտորոշում։

Բժիշկների ցուցումները: Բազմաթիվ բժշկական կազմակերպություններ, այդ թվում ԱՀԿ Առողջապահության համաշխարհային կազմակերպություն, խորհուրդ չեն տալիս օգտագործել իմունոմոդուլյատորներ ՍՇՎՎ-ի բուժման համար։ Փոխարենը, խորհուրդ է տրվում օրգանիզմին աջակցել բավարար հեղուկի ընդունմամբ, հանգստով և անհրաժեշտության դեպքում ջերմիջեցնող դեղամիջոցներով, ինչպես նաև ընտրված գրագետ մանկաբույժի հսկողությամբ։

Կարևոր է!

Մինչև ցանկացած դեղամիջոցի, այդ թվում՝ իմունոմոդուլյատորի ընդունումը սկսելը, կարևոր է խորհրդակցել բժշկի հետ։ Հետևեք «Մի վնասիր» սկզբունքին, քանի որ հաճախ ՍՇՎՎ-ի լավագույն բուժումը մնում է պարզապես ախտանշանների թեթևացումը և հանգիստը։