Եթե դուք կարդում եք այս հոդվածը, ապա, ամենայն հավանականությամբ, ցանկանում եք համոզվել, որ ձեր առողջության հետ ամեն ինչ կարգին է։ Հենց այդ նպատակով էլ ստեղծվել են սկրինինգային (Checkup) ծրագրերը՝ առողջ մարդկանց առողջական վիճակը գնահատելու համար։
Կարևոր է ընդգծել՝ առողջ մարդկանց։ Եթե արդեն ունեք որևէ ախտանիշ կամ հայտնի հիվանդություն, ապա այդ հարցով անհրաժեշտ է դիմել բժշկի։ Այդ դեպքում խոսքը Checkup-ի մասին չէ, այլ բժշկական հսկողության և հիվանդության վարույթի։
Checkup ≠ բժշկական հսկողություն
Ինչպես ենք կազմել մեր Checkup ծրագիրը
Հաճախ Checkup ծրագրերը ներառում են բազմաթիվ անալիզներ և հետազոտություններ՝ «գուցե ինչ-որ շեղում գտնվի» սկզբունքով։ Սակայն մեր մեծահասակների Checkup-ի ծրագիրը տարբերվում է այն ծրագրերից, որոնք սովորաբար առաջարկվում են կլինիկաներում։
Դրա համար կան մի քանի պատճառ.
1. Յուրաքանչյուր հետազոտություն, բացի հնարավոր օգուտից, ունի նաև հնարավոր ռիսկեր։
Օրինակ՝ գաստրոսկոպիայի ընթացքում հնարավոր է հայտնաբերել ստամոքսի փոփոխություններ, ինչը լավ է։ Սակայն նույն հետազոտության ընթացքում հնարավոր է վնասել կերակրափողը, ինչը ռիսկ է։
2. Առանց ցուցման կատարվող հետազոտությունները կարող են հանգեցնել գերախտորոշման (հիպերդիագնոստիկա)։
Սա նշանակում է, որ կարող են հայտնաբերվել այնպիսի փոփոխություններ, որոնք բուժման կամ որևէ միջամտության կարիք չունեն, սակայն առկա են։ Օրինակ՝ լյարդի ուլտրաձայնային հետազոտության ժամանակ կարող է հայտնաբերվել կիստա կամ արյունատար անոթի ոլորուն կառուցվածք։
3. Հետազոտությունները կարող են ունենալ կեղծ դրական արդյունքներ։
Հաճախ կարելի է հանդիպել պատմությունների, երբ մարդուն հայտնում են լուրջ ախտորոշման մասին, սակայն հետագայում պարզվում է, որ անալիզի արդյունքը սխալ էր։
4. Հետազոտությունները կարող են ունենալ նաև կեղծ բացասական արդյունքներ։
Այս դեպքում մարդը կարող է իրականում ունենալ հիվանդություն, սակայն հետազոտությունը սխալմամբ չի հայտնաբերում այն։ Արդյունքում հիվանդությունը կրկին կասկածելու հնարավորությունը կարող է ուշանալ։
ԱՄՆ-ում գործում է անկախ կազմակերպություն՝ USPSTF (United States Preventive Services Task Force), որը վերլուծում է գիտական հետազոտությունները և ընտրում է միայն այն սկրինինգային հետազոտությունները, որոնց ակնկալվող օգուտը գերազանցում է հնարավոր ռիսկերը։
Մեր Checkup ծրագիրը մեծապես հիմնված է հենց USPSTF-ի առաջարկությունների վրա։ Մեզ համար կարևոր է, որ որևէ անալիզ կամ հետազոտություն չկատարվի «ուղղակի այնպես»։ Մենք միշտ պետք է հասկանանք, թե տվյալ հետազոտությունը ինչ հարցի է պատասխանում և արդյոք դրա ակնկալվող օգուտը գերազանցում է հնարավոր վնասները։
Մեր ծրագրի յուրաքանչյուր բաղադրիչը նաև համեմատվում է մասնագիտական բժշկական ընկերությունների՝ օրինակ սրտաբանների և ուռուցքաբանների միջազգային ուղեցույցների հետ։
Բացի այդ, մեր Checkup ծրագրում ներառված են նաև Առողջապահության համաշխարհային կազմակերպության (ԱՀԿ) և ԱՄՆ Հիվանդությունների վերահսկման և կանխարգելման կենտրոնի (CDC) կողմից մեծահասակների համար առաջարկվող պատվաստումները։
Մեր ծրագրի ամենակարևոր մասը
Այնուամենայնիվ, մեր Checkup ծրագրի գլխավոր բաղադրիչը ոչ թե անալիզներն են, այլ մեր մասնագետների խորհրդատվությունները։
Թերապևտը
- մանրամասն կզրուցի Ձեզ հետ ձեր առողջական վիճակի մասին,
- կկատարի ֆիզիկալ զննում,
- կհայտնաբերի հիվանդությունների հնարավոր ռիսկի գործոնները,
- կքննարկի ձեզ համար առաջարկվող պատվաստումները,
- կմեկնաբանի անալիզների արդյունքները,
- և կտա առողջ ապրելակերպին վերաբերող անհատական խորհուրդներ։
Գինեկոլոգը
- կկատարի գինեկոլոգիական զննում,
- կգնահատի վերարտադրողական համակարգի և կրծքագեղձերի հիվանդությունների ռիսկի գործոնները,
- և կխորհրդակցի կանանց առողջության վերաբերյալ հարցերով։
Հոգեբույժը
- կանցկացնի անհանգստության և դեպրեսիայի գնահատման թեստեր,
- կպատասխանի հոգեկան առողջությանը վերաբերող ձեր հարցերին,
- և կտա խորհուրդներ հոգեկան առողջության պահպանման համար։
Սքրինինգի արդյունքը
Մեր ծրագիրը կօգնի ժամանակին բացառել կամ վաղ փուլում հայտնաբերել այն հիվանդությունները, որոնք կարող են նվազեցնել կյանքի որակը և կրճատել կյանքի տևողությունը։
Դուք կստանաք.
- հետագա սքրինինգային հետազոտությունների անհատական պլան,
- առողջ ապրելակերպի վերաբերյալ անհատական խորհուրդներ։
Եթե մեր բժիշկները հայտնաբերեն որևէ հիվանդություն, մենք կկազմենք հետագա հետազոտությունների և բուժման անհատական պլան։
Ստորև ներկայացված են Checkup ծրագրերը՝ ըստ ձեր սեռի և տարիքի։
Միաժամանակ, ձեր Checkup ծրագիրը կլինի անհատականացված։ Օրինակ, եթե վերջերս արդեն հանձնել եք վիրուսային հեպատիտների հետազոտությունները, դրանց կրկնակի իրականացումը անհրաժեշտ չի լինի։ Իսկ եթե չեք ցանկանում անցնել սկրինինգի որևէ բաղադրիչ, մենք այն կհեռացնենք ձեր ծրագրից։
Մեր նպատակն է ստեղծել ձեզ համար առավել օգտակար, հիմնավորված և անհատականացված Checkup ծրագիր։
