Ամառը հիանալի ժամանակաշրջան է, երբ կարելի է հաճույքով ժամանակ անցկացնել, խաղալ և զբաղվել սպորտով մաքուր օդին։ Սակայն, որպեսզի հանգիստը լինի հաճելի և օգտակար, կարևոր է հետևել անվտանգության կանոններին։ Արևը էներգիա է տալիս ողջ կենդանի բնությանը, բայց կարող է նաև վնասել մեզ։ Նրա ուլտրամանուշակագույն ճառագայթները կարող են վնասել մաշկը և աչքերը, ինչպես նաև բարձրացնել մաշկի քաղցկեղի զարգացման ռիսկը։ Քանի որ երեխաները շատ ժամանակ են անցկացնում դրսում, հատկապես ամռանը, կարևոր է պաշտպանել նրանց արևի ազդեցությունից։ Խոսեք մանկաբույժի հետ, եթե ունեք որևէ հարց երեխայի արևից պաշտպանության վերաբերյալ։

Ահա մի քանի խորհուրդներ, թե ինչպես պաշտպանել ձեր ընտանիքը շոգից և արևի ճառագայթների ավելորդ ազդեցությունից՝

·      Երեխաներին մինչև 6 ամսական հեռու պահեք ուղղակի արևի ճառագայթներից։ Գտեք ստվեր ծառի, հովանոցի կամ մանկասայլակի ծածկոցի տակ:

·      Կանխեք ջրազրկումը։ Խրախուսեք ձեր երեխաներին հաճախ ջուր խմել և այն պահել մոտ։ Անգամ մինչև նրանք խնդրեն ջուր, ապահովեք, որ այն հասանելի լինի։ Եթե դուրս եք գալիս, վերցրեք ձեզ հետ ջրի շշեր։ Հետևեք, որ երեխան բավարար քանակությամբ հեղուկ ստանա, իսկ կրծքով կերակրվող երեխաներին ավելի հաճախ կերակրեք, քանի որ կրծքի կաթն է նրանց հեղուկի հիմնական աղբյուրը։

·      Փորձեք պահպանել հարմարավետ ջերմաստիճան տան ներսում։

·      Սահմանափակեք արևի տակ գտնվելը 10:00-ից 16:00-ը, երբ ուլտրամանուշակագույն ճառագայթներն առավել ուժեղ են։ Եթե հնարավոր է, բացօթյա ակտիվությունները պլանավորեք օրվա ամենազով ժամերին կամ երեկոյան։

·      Շատ շոգ եղանակին ավելի լավ է կարճ ժամանակով գնալ լողավազան կամ լողափ, կամ մնալ տանը՝ զբաղվելով ձեռագործությամբ, ընթերցանությամբ կամ սեղանի խաղերով։

·      Նախապես պլանավորեք ստեղծագործական եղանակների մասին, եթե գիտեք, որ անընդմեջ մի քանի օր ուժեղ շոգ կլինի: Փորձեք մտածել գործունեությունը փոխելու և խուսափելու շոգի տակ երկար մնալուց։

·      Երբ ձեր երեխան շոգում է, կարող եք օգտագործել ցնցուղ, լոգարան կամ ջրային թեթև ցողացիր, որպեսզի նա հովանա։ Լողը ևս հիանալի միջոց է հովանալու և միաժամանակ ակտիվ մնալու համար։ Հիշեք, որ երեխաները միշտ պետք է վերահսկվեն լողանալու կամ ջրային խաղերի ժամանակ։

·      Օգտագործեք արևապաշտպան քսուք։ SPF մակարդակը պետք է համապատասխան լինի ուլտրամանուշակագույն ճառագայթների ինդեքսին, որը կարելի է ստուգել եղանակի հավելվածում։ ՈւՄ ինդեքսը 3 և բարձր լինելու դեպքում արևապաշտպանությունը պարտադիր է։ Խորհուրդ է տրվում օգտագործել նվազագույնը SPF30 և օպտիմալ՝ SPF50, հատկապես բարձր ՈւՄ ինդեքսի դեպքում։

·      Համոզվեք, որ ձեր ընտանիքի բոլոր անդամները գիտեն, թե ինչպես պաշտպանել իրենց մաշկն ու աչքերը։ Մի մոռացեք լավ օրինակ ծառայել՝ հետևելով արևային անվտանգության կանոններին։

·      Նախապես ուսումնասիրեք կամ քննարկեք մանկաբույժի հետ ջերմային հարվածի ախտանիշները։

Ինչպե՞ս ճիշտ հագցնել երեխային շոգ եղանակին

·      Հնարավորության դեպքում հագցրեք ձեզ և ձեր երեխաներին հարմարավետ, թեթև հագուստ, որը ծածկում է մարմինը, օրինակ՝ բարակ բամբակյա տաբատներ, երկարաթև վերնաշապիկներ և գլխարկներ։

·      Ընտրեք խիտ հյուսվածքով կտորից պատրաստված հագուստ, քանի որ այն ավելի լավ է պաշտպանում, քան նոսր հյուսվածքով կտորը։ Եթե վստահ չեք կտորի խտության մասին, բարձրացրեք այն լույսի դեմ և տեսեք, թե որքան լույս է անցնում դրա միջով։ Որքան քիչ լույս անցնի, այնքան ավելի լավ է։

·      Ընտրեք նաև ազատ հագուստ, որը լավ օդափոխություն է ապահովում և պաշտպանում է ուղիղ արևի ճառագայթներից։ Միաշերտ, խոնավությունը ներծծող նյութից պատրաստված հագուստը կարող է նպաստել քրտինքի գոլորշիացմանը՝ ստեղծելով սառեցնող ազդեցություն։

·      Հագեք լայնեզր գլխարկ, որը կպաշտպանի դեմքը, ականջները և պարանոցի հետևի հատվածը։

·      Կրեք ուլտրամանուշակագույն պաշտպանությամբ արևային ակնոցներ՝ նվազագույնը 99%։ Ձեր երեխայի համար ընտրեք համապատասխան չափի արևային ակնոցներ՝ ուլտրամանուշակագույն պաշտպանությամբ։ Դա ոչ միայն ապահով է, այլև ոճային։

Երբեք մի թողեք երեխաներին կայանված մեքենայի մեջ!

·      Նույնիսկ եթե դրսում զով է, մեքենաները կարող են շատ արագ տաքանալ մինչև վտանգավոր ջերմաստիճանի։

·      Հեռու չէ՝ պատուհանը բաց թողնելը բավարար չէ. Մեքենայի ներսի ջերմաստիճանը կարող է առաջին 10 րոպեների ընթացքում բարձրանալ մոտ 10 աստիճանով, նույնիսկ եթե պատուհանը կիսաբաց է։

·      Առանց հսկողության կայանված մեքենաներում թողնված երեխաները առավել մեծ վտանգի տակ են գտնվում՝ ստանալու ջերմային հարված։

·      Հիշեցնելու համար, որ մեքենայում երեխա կա, դրեք փափուկ խաղալիք մեքենայի նստատեղին։ Երբ երեխան ամրագոտիով է, փափուկ խաղալիքը տեղադրեք վարորդի առջև

·      Մեքենայից դուրս գալիս համոզվեք, որ բոլորը դուրս են եկել։ Մի թողեք մեքենայում քնած երեխաներին առանց ուշադրության։

Եթե երեխան ստացել է արևային այրվածք կամ ջերմային հարված՝ դիմեք բժշկական օգնության։

Այլ հոդվածներում ես կպատմեմ, թե ինչպես օգնել երեխային արևային այրվածքների դեպքում, ինչպես ճանաչել ջերմային հարվածը և ինչպիսի օգնություն ցուցաբերել նման իրավիճակներում։

Աղբյուրներ:

https://www.cdc.gov/heat-health/about-heat-and-your-health.html

https://www.cdc.gov/heat-health/heat-and-children.html

https://www.healthychildren.org/English/safety-prevention/at-play/Pages/Sun-Safety.aspx

https://www.healthychildren.org/English/safety-prevention/at-home/Pages/Protecting-Children-from-Extreme-Heat-Information-for-Parents.aspx