Աղիքային վարակները երեխաների մոտ հաճախ ուղեկցվում են լուծով, փսխումով, բարձր ջերմությամբ և այլ ախտանիշներով, որոնք կարող են բերել հեղուկի և էլեկտրոլիտների կորստի։ Ուստի, ճիշտ քանակությամբ ջուր խմելը, հանդիսանում է բուժման և վերականգնման կրիտիկական կարևորություն ունեցող մաս։

Ինչո՞ւ է կարևոր ջուր տալ։

Ջրազրկման կանխարգելում։ Լուծը, փսխումը և բարձր ջերմությունը նպաստում են հեղուկի արագ կորստին։ Ջրազրկումը կարող է ունենալ լուրջ հետևանքներ երեխայի առողջության համար՝ ներառյալ կենսական նշանակություն ունեցող էլեկտրոլիտների անկում, հոսպիտալացում, իսկ մինչև 1 տարեկան փոքր երեխաների համար կարող է ունենալ մահացու հետևանքներ։

Ինքնազգացողության բարելավում։ Հեղուկի ճիշտ ընդունումը նպաստում է ախտանիշների թեթևացմանը, ինչպիսիք են գլխացավը և հոգնածությունը, որոնք կարող են առաջանալ հեղուկի կորստի հետևանքով։

Իմունային համակարգի աջակցություն։Հիդրատացիան օգնում է օրգանիզմին ավելի արդյունավետ պայքարել վարակի դեմ և պահպանում է բոլոր համակարգերի նորմալ աշխատանքը։

Խորհուրդներ ջուր խմելու վերաբերյալ

Օգտագործեք ռեհիդրացիոն լուծույթներ։Աղիքային վարակներով երեխաների ջուր խմելու համար լավագույն տարբերակը բերանային ռեհիդրացիոն լուծույթներն են (ԲՌԼ): Դրանք պարունակում են աղերի և շաքարների օպտիմալ համադրություն, որոնք օգնում են վերականգնել ջրաէլեկտրոլիտային հավասարակշռությունը։

Հեղուկի քանակը։ Խորհուրդ է տրվում երեխային ջուր տալ փոքր չափաբաժիններով։ Փսխման դեպքում նախ պետք է դադարեցնել փսխումը, այնուհետև փոքր չափաբաժիններով՝ 10-20 մլ յուրաքանչյուր 10 րոպեն մեկ։ Կարելի է օգտագործել օնդանսետրոն դեղամիջոցը, որը կդադարեցնի փսխումը, և երեխային հնարավոր կլինի բերանով ջուր խմել , սակայն դրա չափաբաժինը պետք է հաշվարկի բժիշկը։
Խորհրդանշական հեղուկի քանակը՝ 50-100 մլ յուրաքանչյուր ժամ՝ փոքր երեխաների համար,ավելի մեծ երեխաները կարող են խմել ավելի մեծ քանակությամբ։

Խուսափեք քաղցր ըմպելիքներից։ Հյութերն ու գազավորված ըմպելիքները կարող են սրել լուծը, ուստի պետք է խուսափել դրանցից։

Ե՞րբ դիմել բժշկական օգնության։

Եթե երեխայի մոտ նկատվում են ծանր ջրազրկման նշաններ (հոգնածություն, մաշկի և լորձաթաղանթի չորություն, միզարձակման բացակայություն և այլն), անհրաժեշտ է անհապաղ բժշկական օգնություն ստանալ հիվանդանոցային պայմաններում։

Եթե նկատում եք երեխայի մոտ աղիքային վարակի նախնական նշաններ, ցանկալի է դիմել մանկաբույժի՝ դիտարկման, հեղուկի ճիշտ քանակի հաշվարկման և համախտանիշային թերապիայի նշանակման համար։