Բարև ձեզ։
Իմ անունն է Ռուզաննա Ավանեսյան, ես մանկաբույժ և մանկական ռևմատոլոգ եմ։
Ինչո՞ւ եմ դարձել բժիշկ։ Դեռ մանկուց ինձ հետաքրքրում էին բնական գիտությունները, և ցանկանում էի օգնել մարդկանց․ այս ամենը իդեալականորեն համատեղվում է բժշկության մեջ։
Բժշկական ինստիտուտում սովորելու առաջին կուրսերից ինձ սկսեց հետաքրքրել ռևմատոլոգիան՝ որպես բժշկության ոլորտ, որը պահանջում է ախտանշանների խորքային և համակողմանի վերլուծություն և հաճախ իրենից ներկայացնում է բարդ հանելուկների ամբողջություն՝ իսկական մարտահրավեր բժշկի համար։ Հինգերորդ կուրսում, մանկական հիվանդությունների ցիկլին ծանոթանալուց և մանկական ռևմատոլոգիայի հիանալի խմբակին մասնակցելուց հետո, ես որոշեցի դառնալ մանկաբույժ։
Ես ընդունում եմ 0-ից մինչև 18 տարեկան պացիենտների։ Բուժման ընթացքում առաջնորդվում եմ ապացուցողական բժշկության սկզբունքներով։
Իմ մասնագիտական գործունեության ընթացքում ես աշխատել և անցել եմ ստաժավորումներ տարբեր կլինիկաներում և երկրներում, հանդիսանում եմ ավելի քան 10 գիտական հոդվածների հեղինակ և ունեմ դասավանդման փորձ։ Ինձ համար կարևոր է շարունակաբար խորացնել իմ գիտելիքները և հետևել իմ ոլորտում պացիենտների հետազոտման և բուժման նոր ուղեցույցներին, քանի որ բժշկական գիտությունը մշտապես զարգանում է։ Վերջին 20-30 տարիների ընթացքում մեր հնարավորությունները ծանր հիվանդությունների ախտորոշման և բուժման հարցում բազմապատկվել են՝ զգալիորեն բարելավելով դրանց կանխատեսումը։
Իմ գիտական հետաքրքրությունների շրջանակում առանձնահատուկ տեղ են զբաղեցնում երեխաների մոտ հենաշարժիչ համակարգի հիվանդությունները և համակարգային հիվանդությունները։
Իմ մասնագիտության մեջ նաև շատ կարևոր են հաղորդակցական հմտությունները։ Այդ պատճառով ես մշտապես աշխատում եմ դրանց կատարելագործման վրա․ անցել եմ բժշկական հաղորդակցության մի շարք դասընթացներ, սովորել եմ էրիկսոնյան հիպնոզի հիմունքները, ուսումնասիրում եմ փոքրիկ պացիենտների հոգեբանությունը, այդ թվում՝ ինչպես անցկացնել զննումը հնարավորինս քիչ տրավմատիկ նրանց համար։